Usa ka batan-ong sakop sa rebelding New Peoples’ Army (NPA) ang napatay samtang laing usa usab ang nasamdan ug padayong gitambalan karon sa kasundaluhan, dihang nahitabo ang engkwentro tali sa 29th IB Phil. Army ug rebelding NPA sa bukirang bahin sa Kamingawan, Brgy. San Isidro, Santiago, Agusan del Norte niadtong adlawng Sabado, Nobyembre 2.
Wala pa nailhan ang usa ka NPA nga napatay ug padayon pa ang gihimung imbistigasyon labot niini apan nasuta nga residenti kini sa Brgy. Mahanob, Gicaquit, Surigao del Norte.
Samtang ang samdan nga sakop sa NPA giila nga si Kent Antonio, 19 anyos nga taga Negros Occidental.
Sigun ni Lt. JB, platoon leader sa 29th IB Phil. Army nga nagpatrolya ang tropa sa kalasangan sa maong dapit sa dihang ilang na-engkwentro ang mokabat sa 20 ka mga armadong NPA bandang alas 10 ang takna sa buntag.
Milungtad sa 15 minutos ang bakbakan ug daling mikalagiw ang mga rebelding NPA sa wala masayring direksyon biniyaan ang samdam nilang kauban nga si Kent uban ang duha ka M4 Carbine riffles ug mga combat gears.
Ang na-engkwentro sa military mao ang membro sa Sentro de Grabidad (SDG) 16A, Guerilla Front Committee 16, North Eastern Mindanao Regional Command ubos ni Kumander Kadong.
Daling giluwas sa kasundaluhan ang samdan nga NPA ug gidala sa hospital aron tambalan.
Nasayran nga gikan sa Negros Occidental si alyas Kent ug napadpad kini sa Agusan del Norte gumikan sa paglingla sa NPA nga modaku ang income niini pinaagi sa pagpangilkil sa mga mining companies (with reports archer capadeso/ ivy falcone).
[image: npa wounded.jpg]
