GUIHULNGAN NEGROS ORIENTAL – Naglab-ot sa 28 ka aksyon militar ang ginlunsar sang Leonardo Panaligan Command, New People’s Army, Central Negros Guerilla Front sa sulod sang lima ka bulan, Pebrero tubtob Hunyo 12 sini nga tuig.
Sa press release nga pirmado ni Ka JB Regalado, ang spokesperson sang grupo ila nakompiska ang 5 ka mga high powered firearms, 29 ka short arms, 9 ka handheld radios, 6 ka mga cellphones kag mga mga magasin sang bala sang nagkalain lain nga armas.
Isa mga madilag-on nga operation sang NPA amu ang pagraid sa balay sang bag-o gid lamang napilian nga Kapitan nga si Mike ‘Dongkoy’ Jacosalem sang Barangay Humay-humay sa Hunyo 12, las 4:30 sang kaagahon. Napatay una sa raid ang tinawo ni Kapitan nga si Lenmar Cabasag kag kretikal naman si Jacosalem apang pagkasunod nga adlaw, napatay man ini sa Riverside Medical Center sa Bacolod.
Gin-silutan sang NPA si Jacosalem bangod man sa gina-aligar inbolbado ini sa sindikato sang druga sa Cebu kag Guihulngan. May kaso man ini tatlo ka bes nga pagpamatay, cattle rustling, paghimulos, paghupot sang goons kag mga armas.
Narecover nila sa amu nga raid ang lima ka mga armas (apat ka pistola kag isa ka shotgun), mga bala, walo ka handheld radio kag tatlo ka mga cellphones.
Wala pa nakahatag sang komento ang iya pamilya nahanungod sini nga alegasyon sang mga rebelde.
Gin-ako man sang NPA nga sila ang may kahimuan sa pagharass sa duha ka mga Cafgu Detachment sang Hunyo 12, las 7 sang gab-i sa Barangay Imelda, Guilhulngan kag Barangay Guba, Vallehermoso.
Nagpatigayon man sila sang tatlo ka mga police actions sa La Castellana, Moises Padilla kag Guihulngan.
Wala nakapaguwa sang ila reaction ang mga katapo sang militar angot sa sini nga mensahe sang NPA.
