Positibo ang pagbaton sang Negros Property Management and Development Corporation (NPMDC) sa pag-terminate na sang provincial government sang ila joint venture agreement (JVA) sa pag-manage sang Negros First Cyber Centre.
Suno kay Provincial Administrator Rayfrando Diaz, gin-imbitaran na ni NPMDC chair Salvador Enriquez Jr. ang team ni Governor Bong Lacson para sa turn-over sang mga dokumento sang mga naga-renta sa Cyber Centre. Ang nasambit nga team ang pamunuan ni former 3rd District Congressman kag karun provincial consultant Alfredo Benitez.
Una na nga nagpadala si Gov. Lacson sang notice of termination sang JVA sa NPMDC matapos ini ginhatagan otoridad sang Sangguniang Panlalawigan kasunod sang ginpatigayon nga review sa diin nagaguwa nga pierde ang provincial government.
Ang Cyber Centre ang gintukod sa tion anay ni former Governor Alfredo Maranon Jr. kag ang NPMDC ang ginpa-manage sa diin sila ang nangita sang mga manug-renta kag magahatag lang sila sang P15 million nga tuigan nga share sa provincial government. Apang nagaguwa nga kulang ang ila ginabayad sa diin sang 2016, P4. 6 million lang ang ila ginhatag sa probinsiya; P9 million sang 2017; P11.3 million sang 2018 kag P14 million naman sang 2019.
Suno kay Atty. Diaz, kulang ini sa ginabayad sang provincial government nga P60 million kada tuig sa gin-loan sini nga P450 million para idugang sa pondo sang construction nga nagadangat sa P607 million. Sugod sa Enero 2021, ang provincial government na ang magapadalagan sang Cyber Centre.
[image: image.png]
