Despues ya queda sicat si Jomarie Eugenio del anio pasao porcausa ya man taclas le na punta del dos torre del NGCP na Guisao y na Buenagatas, Boalan, tiene ya tambien otro persona el esperanzao ay queda sicat despues este ya subi tamen na un torre del un cell site na Sta. Catalina enante aga.
Anoche pa asegun si Rodel Gagaracruz, 30-anios de edad, casao de Talon-Talon quien ta sufri un enfermedad na pensamiento ya subi na palupu del un casa na Talon-Talon pero dayun con este ya puede afasigua y ya lleva conele na Zamboanga City Medical Center.
Pero pasada alas 4 del aga enante ya puede escapa si Gagaracruz na hospital y ya anda este na torre donde cuantos metro solamente distancia Adelante del gate del hospital.
Ya subi si Gagaracruz na torre hasta ya guinda este na punta y noquiere mas abaha.
Dayun ya conduci negosacion el familia di Gagaracruz y maga miembro del pulis y del BFP SRU para manda abaha conele pero nohay este abaha.
Pasada ya alas 9 del aga cuando ya subi tambien na torre el hermano mayor di Gagaracruz donde ya tene estos el corto conversacion hasta ya sigi abaha si Rodel consu hermano.
Dayun tambien ya lleva con Gagaracruz na hospital para dale el propio curada medical.
