Ha pinag usa nga pwersa han mga elemento han Criminal Investigation and Detection Group, PNP Region 8 ngan Cagayan De Oro police. Nasakpan ngan arestado an numero uno nga Most Wanted Person han Burauen Leyte nga hi Lito Penada Sarino, 38 anyos, may asawa, waray trabaho ngan residente ha Brgy. Limburan ha Burauen.
Base hiton intellegence monitoring han mga kapulisan, nahikit-an hi Sarino ha Brgy. Calaanan, Cagayan De Oro City ngan didto na liwat hiya nadakop han mga operatiba.
May warrant of arrest ini hi Sarino nga may kaso nga murder nga gin issue ni Judge Tarcelo Sabarre Jr. han 8th Judicial Region han Regional Trial Court. Waray bail ini nga kaso.
Ha pagka yana tapos na an documentation han suspek ha CIDG Cagayan De Oro ngan igkakadto na hiya ha Burauen PNP para didto maipaslak.
