Nadugangan ang numero sang person under monitoring sa coronavirus disease 2019 ukon COVID 19 sa South Cotabato tungod base sa datos sang Provincial Health Office naglab-ot na sa 10 nga halin ang mga ini sa Hongkong, China, Taiwan kag Malaysia.
Sa nasambit nga numero suno kay Provincial Health Officer Dr. Rogelio Aturdido Jr., pito sa mga ini ang tigayon na nakaggraduate sa 14 ka adlaw nga self – quarantine kag wala gid nakitaan sang sintomas sang COVID 19.
Liwat man ginaadvice ni Dr. Aturdido sa mga pumuluyo nga indi magpanic kon may person under monitoring ukon mga tawo nga may history of travel sa mga pungsod nga kumpirmado nga may COVID-19, apang wala sang sintomas sang nasambit nga balatian kapareho sang lagnat, ubo, sip-on kag nabudlayan sa pagginhawa.
Samtang tungod papalapit naman ang kapyestahan sang pipila ka banwa sa South Cotabato ginahingyo ni Dr. Aturdido sa mga pumuluyo dire sa probinsya nga kon may paryenti nga magpauli nga halin sa China, Hongkong kag Taiwan nga mamyesta ang indi na lang magpauli kon alanganin nga makapaidalom sa 14 days self-quarantine.
