OCD-XI: Magnitude 6.7 nga linog sa Sarangani, walay damage ug casualty

Davao City – Gikumpirma sa Office of the Civil Defense (OCD)-XI nga wala natala nga damyos ug casualty human sa magnitude 6.7 nga linog nga misentro sa Balut Island, Sarangani, Davao Occidental, alas 4:48 sa kaadlawon, Enero 9, 2024.

Sa interview sa DXDC RMN Davao kang Franz Irag, Information Officer sa OCD-XI, atol sa ‘Serbisyong Straight To The Point’ program uban si RadyoMaN Renz Barbarona, iyang gibutyag nga ang maong kusog nga linog nabati sa mga probinsya sa Davao Region, diin Intensity 2 ang nabati sa Davao City, Intensity 3 sa Davao del Norte, Intensity 2-3 sa Davao del Sur, Intensity 3 usab sa Davao Occidental, Davao de Oro ug Davao Oriental.

Matud ni Irag nga nakatutuok usab karon ang ahensya sa pagpahigayon og Nationwide Simultaneous Earthquake Drill (NSED) ilabi na sa mga eskwelahan ug sa matag lokalidad, aron mabansay kanunay ang mga estudyante kung unsa ang himuon panahon sa linog.

“Gina-awhag pa gyud namo ang tanan nga mupartisipar kanunay ilabi na sa atong ginapatigayon nga quarterly Nationwide Simultaneous Earthquake Drill (NSED) ilabi na sa local level ug sa barangay level mismo,” sulti ni Irag.

Gipahinumduman usab ni Irag ang publiko ang importansya sa pag-perform sa duck, cover, and hold panahon sa mga pagtay-og aron malikayan ang disgrasya. Karong 2024, target sa Marso himuon ang NSED alang sa unang quarter sa tuig.

RadyoMaN Kirby Manzon