Davao City- Subling gi-agni karon sa Office of Civil Defense (OCD-XI) ang katawhan nga pangandaman gayud ang pagkunsad sa tanang matang sa emerhensiya sama sa linog kun pagtay-og, tsunami, baha, landslide kun pagdahili sa yuta ug uban pang mga natural ug man-made disasters.
Sa pakighinabi sa media, gibatbat ni OCD-XI chief Leoncio Cirunay nga gumikan sa pag-entra na sa monsoon season, labaw’ng gikinahanglan nga mangandam kita sa personal level ug magtinabangay haron mahalikay nga madiskuhido.
Matud ni Cirunay, gumikan sa padayon nga pagka-highly urbanized locality sa Davao, dili kalikayan nga matukod ang mga istruktura hangtud sa kabukiran diin gumikan sa distroso sa atong kabukiran ug kalasangan, malisud na unya ang pag-kontrolar sa bul-og sa tubig-ulan paingon sa downtown areas kun sa kasyudaran.
Niadtong nilabay’ng semana, gitugaw ang atong mga motorista ug mga lungsuranon sa dihang kalit ni-apaw ang tubig sa Matina River hinungdan nga nilampornas kini sa sentrong bahin sa dakbayan hinungdan sa grabeng baha, buhol-buhol kun nagkadenang trapiko ug ang pagbakwit sa mga apektadong pamilya niadtong tungora.
Subay ning maong realidad, karong Hulyo 14, usa ka citywide earthquake ug tsunami drill ipahigayon aron pagpataas sa lebel sa kahimatngon sa mga residente sa hustong response panahon sa emerhensiya.
Kasamang June Duterte
