Gin-anunsyar ni Bacolod City Mayor Evelio “Bing” Leonardia sa interview sang DYHB nga magapatigayon sang number coding sa gin issued nga mga Home Quarantine Pass sa tagsa ka mga pumuluyo sang syudad sang Bacolod para ma regulate ang pagguwa sang mga tawo bangud ila nakit-an nga madamo sang volume sang tawo ang padayon nga nagaguwa sa ila nga puluy-an apisar sang ginapatigayon nga enhanced community quarantine (ECQ).
Suno kay Leonardia, iya gin meeting ang mga Punong Barangay sa syudad kag ila nga ginkasugtan nga magapatigayon sang ODD-EVEN scheme sa pag guwa sa ila nga mga puluy-an, buot silingon nga ang Quarantine Pass nga nagatapos sa ODD numbers (1-3-5-7-9) ang mahimo lang nga maka guwa sa adlaw nga Lunes, Miyerkules kag Biyernes, samtang ang EVEN numbers (2-4-6-8-0) ang mahimo lang maka guwa sa adlaw nga Martes, Huwebes kag Sabado. Ginabawal naman ang pag guwa sa adlaw nga Domingo.
Buwas nga adlaw igapaguwa suno sa Alkalde ang iya nga Executive Order (EO) kag natalana nga ipatuman ini sa adlaw nga Miyerkules Abril 15 dire sa syudad sang Bacolod.
[image: image.png]
