General Santos City—Anaa na karon sa kustudiya sa POLO-OWWA nga nakabase sa nasud Kuwait ang OFW nga si Juvelyn Gomez nga taga Klinan 6, Polomolok, South Cotabato kansa una nang nakasinati ug pagpang-aboso gikan sa iyang amo.
Mismong si Merci Gomez, ang ugangan sa nasangpit nga OFW maoy mikumperma sa RMN-Gensan nga luwas na gikan sa kamot sa iyang amo ang nahisgutan.
Nasayran nga ang OWWA maoy ni-communicate ngadto sa mga ahensya sa gobyerno sa Kuwait ug nasuta nga wala na sa kustudiya sa iyang amo si Juvelyn inay anaa na kini sa kustudiya sa POLO.
Gibutyag usab ni Merci nga sila tabangan sa gobyerno nga makauli si Juvelyn sa nasud partikular sa ilang panimalay sa Polomolok.
Una nang nagbutyag ang iyang umagad nga dili na niya buot pang mutrabaho sa Kuwait tungod sa mga pagpangulata nga iyang naangkon gikan sa iyang nahimong amo. Sa kasamtangan ginaandam na ang mga papeles aron nga mahikay na ang pagpauli kang Juvelyn sa nasud.
Samtang dako a ng pagpasalamat ni Merci sa RMN Gensan kansa usa sa mga nakatabang pinaagi sa pag refer kanila sa mga buhatan sa gobyerno nga gitahasang mutabang sa mga giabusong OFW.
