Report ni: Jennifer Palomo Debaja
Magluwas nga menor de edad si JUHRA ADJARAMAN sang gin retoke sang nagdeploy nga agency ang iya edad, 10 na ini ka tuig nga gintago sang amo kag nagpati na ang iya pamilya sa Mindanao nga patay na ini.
Una nga nanawagan sang bulig sa social media sang Pebrero 21, 2019 ang isa ka OFW sa Jordan nga nakadiskubre sa sitwasyon sang makaluluoy nga pinay.
Nagpangayo sang bulig si JUHRA ADJARAMAN, taga Mindanao, nga marescue na ini sa mapintas nga amo sa Amman Jordan. Pulo naman ini katuig nga wala sang komunikasyon sa iya pamilya.
Suno pa sa iya, wala man ini sang sweldo sa sulod sang pulo ka tuig kag gina paobra pa sang amo sa balay sang mga abyan apang wala man ginahatag ang bayad nga para kontani sa iya.
Wala naman ini makadumdom sang iya agency kag suno pa sa iya, 16 anyos palang ini sang ginpalakat sang agency sa Jordan. Sa mga papeles naman nga ara sa iya, nakita nga 23 anyos na siya sang gindeploy sang agency. Naga pamatuod lang nga ginpeke ang iya edad.
Sa karon, yara na sa pag inakop sang Embahada si Juhra kag nagapasalig man ang mga opisyaLes sang Embahada nga buligan ini nga makuha ang tanan nga benepisyo nga dapat bayaran sang iya amo.
