BACOLOD CITY – Nag-aregluhanay sanday Punong Barangay Noel Libo-on sang Pahanocoy kag Ronilo Selladora kaina sa korte matapos ginfilan sang kaso ni Kap ang hubinis bangod ginsumbag siya sini sa wala na extend nga bayle sang barangay.
Kaso nga direct assault kag malicious mischief nga ginpasaka sang punong barangay sang Brgy. Pahanocoy batuk sa iya constituent nga nagsumbag sa iya.
Ini ang may kaangtanan sa insidente nga natabo sadtong Enero 28, kon diin ginsumbag sang suspek nga si Ronilo Selladora, legal ang edad kag pumuluyo sang Purok Maghirupay, Brgy. Pahanocoy si Punong Baranay Noel Libo-on.
Suno kay Libo-on nagasaulog sang ila kapiestahan ang Pahanocoy sang amo nga adlaw kag pasado las 12 sang naglabay ini siya sa baylihan nga may yara sang live band.
Kag bangud nga manug-tapos na ang kahiwatan, nagpundo sa makadali ang punong barangay agud nga i-check kag i-secure ang pumuluyo ilabi na sang iya nakita nga isa lang ka barangay tanod ang yara sang amo nga tion.
Samtang nagatindog, suno kay Libo-on ini siya ang ginpalapitan ni Ronilo nga sang amo nga tion tuman ka hubog.
Siling sang punong barangay, nag-request si Ronilo nga kon pwede ma extend ang kahiwatan kay bitin pa ini siya, apang nagpaathag si Liboon nga indi pwede bangud nga may klase kag opisina pagka-aga.
Didto na kag nagpa-init na si Ronilo gani gin-agbayan ini siya ni Libo-on kag ginpakalma, apang ginwakli niya ang kamot sang punong barangay gani natiklod man siya sini.
Sang ginsumbag ni Ronilo ni Libo-on, nakalikaw ang punong barangay gani, nadapyasan lamang ini siya sa iya nawong.
Bangud sini, ginpasakaan ni Libo-on sang kaso si Ronilo, ginkarsel kag kag ginrelease sa prisohan matapos nagpiyansa sang 13 mil pesos.
Nagpangayo sang pasaylo si Ronilo sa ila punong barangay kon diin iya ginsiling nga naghinulsol na ini sa iya nahimo dala pangako nga indi na ini masulit pa.
