Nagalab-ot sa isa ka milyon ka pesos nga kantidad sang marijuana ang gipanggabot kag ginsunog sang Philippine Drug Enforcement Agency ukon PDEA 12 sa Sitio Malalag, Brgy. Napnapon, Palimbang, Sultan Kudarat pasado alas 2:30 sang hapon sang Nobyembre 6, 2017.
Nakapalagyo naman ang suspek nga ginkilala kay alias Motmot Sakay nagamanage sang nasambit nga marijuana plantation sang masiplatan ang pwersa sang gobyerno padulong sa lugar.
Apang nagalab-ot sa more or less lima ka gatos nga puno sang marijuana ang napanggabot nga nagakantidad sang P100, 000.00 kag yara naman sa 4,500 fully grown marijuana hills nga naharvest na nga may DDB value nga P900,000.00 ang ginsunog.
Kaso naman nga pagbayolar sa Section 16 (Cultivation of Plants Classified as Dangerous Drugs) sang Republic Act 9165 ang ipasaka batok sa suspek nga nakapalagyo.
May-angot sini paagi sa kooperasyon sang komunidad suno kay Pdea 12 Regional Director Gil Cesario Castro kon ngaa nasalakay nila ang nasambit nga marijuana plantation.
Ang nasambit suno pa nga marijuana nga halin sa Palimbang ang ginasupply sa bug-os nga isla sang Mindanao kag target naman sini amo ang mga high school students tungod mabakal ang isa ka gramo sang marijuana sa subong sang P20.00 tubtob P50.00.
Ginkumpirmar man ni Castro nga nakatutok sila sa subong sa pagsalakay sa plantasyon sang marijuana sa rehiyon tungod harvest season sini sa subong nga panahon.
photo by: Pdea 12
