El hefe regional del Philippine Drug Enforcement Agency 9 Lyndon Aspacio, CESE, ya habla que el su oficina ya prepara ya el maga profio caso que deve planta na corte encontra con un Basileño conquien ya confisca dos quilo-y-media shabu durante el operacion ya conduci na Estrada Street, Tetuan del Sabado tarde.
Asegun con Aspacio maga caso del violacion del seccion 5 y 11 bajo na articulo 2 del Acto Republica 9165 amo el recomenda sila na fiscalia contra con Al-Jhamer Jakilan y Unding, 33, un security guard y native de ciudad de Isabela, provincial del Basilan.
Acordando banda ala una del tarde del Sabado el combinao fuersa del PDEA ARMM y el PDEA 9 ya encabesa si Aspacio ya conduci el buy-bust operation na Estrada Street, Tetuan donde este ya resulta na aresto di Jakilan.
El grupo di Aspacio ya recobri na posecion di Jakilan el shabu ta alcansa na pesades de 2.4 quilogramo que tiene el valor de P12, 215,000.
Asegun, si Jakilan amo unu de aquelios quien ta hace entra droga aqui na ciudad desde na Basilan, Sulu y Taw-Tawi.
Si Jakilan ta esta pa ahora na celda del PDEA9.
