General Santos City- Planong paimbestighan ni Gensan City Mayor Ronnel C. Rivera kung si kinsa, og asa nga departamento sa LGU GENSAN ang una ng gitumbok ni Gensan City Councilor Atty. Franklin Gacal Jr. nga matud pa nakigpulong sa usa ka financier sa last 2 operation.
Kung kahibaloan, nga gibulgar ni City Councilor Franklin Gacal Jr., Chairman sa kometiba sa Peace and Order and Police Matter sa konseho, nga usa ka opisyal sa Executive Department sa City Hall ang nakig tagbo sa financier sa last-2 kauban ang usa ka Grace Mercado usa sa operator sa Small town lottery STL sa Gensan.
Nagdumili una si Gacal sa pagbulgar sa pangalan sa maong official tungod kay gusto una niining mahinabi ug ma-isplikar sa nahisgutang opisyal ang rason kong nganong ana-a kini sa panagtagbo sa mga gambling Lord sa sugal.
Base sa pahayag ni Konsehal Gacal, bag-ohay lang nagkatagbo ang mga financiers, coordinators ug si Grace Mercado aron hisgutan ang operation sa illegal Last-2 kung diin mitambong ang dakong official sa City Hall ubos sa opisina sa Mayor, dugang sa konsehal nga naghanyag matud pa si Grace Mercado nga i-legalize ang operasyon sa last-2 bugti nga mohatag bahin o porsento ang financier sa illegal Last-2 operation sa syudad.
Dugang pamahayag sa Mayor iyahang sutaon og paimbestigahan ang kontrobersyal nga pamahayag ni konsehal Gacal.
Aminado ang Mayor nga nakadawat na siya og mga text messages kalabot sa maong isyu apan kini kinahanglan imbestigahan ilabi na kung gigamit ang gahum sa gobyerno og nahimong front ang isyu sa STL og gahimo og ilegal nga sugal sa syudad.
