Davao City – Human gimando ni Pres. Rodrigo Duterte nga i-raid ang mga bodega sa bugas aron sutaon kung gisabutahe ba o wala ang suplay sa bugas sa nasud karon, ang Department of Interior and Local Government Davao Region (DILG-XI) abtik misanong sa direktiba nga rondahon ang mga bodega nga gatago og suplay sa bugas.
Sumala ni DILG-XI Regional Director Alex Roldan nga nagkatigom na ang inter-agency aron hisgotan ang paglusad sa operasyon sa mga bodega sa bugas dinhi sa Rehiyon Onse.
Wala na gi-detalye ni Roldan ang detalye sa inter-agency meeting nga nahitabo labot sa operasyon nga ikasa sa mga bodega sa bugas dinhi sa atong dapit.
Ang nindot lang segun sa maong opisyal mao nga dinhi sa partikular sa siyudad sa Dabaw, walay mga negosyante sa bugas nga nagatago og supply sa bugas.
Ang pagtaas sa presyo sa bugas sa merkadohan karon natural lang gumikan usab sa paglihok ug pag-usbaw sa presyo sa produktong petrolyo ug uban pang mga factors o hinungdan.
Segun ni Roldan, dili na bag-o ang sitwasyon karon kay sa miaging administrasyon miparka man pod og P58.00 ang litro sa gasolina mugna sa pagmenos sa produksyon sa mga suppliers sa ubang nasud.
Apan bisan pa man niini, maglusad gihapon og hiniusa nga operasyon ang inter-agency nga pangunahan sa DILG, PNP, NFA, ug uban pang ahensiya sa gobyerno.
Ang madakpang negosyante pasakaan og kaso nga pagsabotahe sa ekonomiya ug kun mahukmang guilty sa korte, mag-atubang og bug-at nga silot, panapos ni Roldan.
RadyoMaN Joel Viray
