Oplan Katok batok tipdas ginapatuman sang mga Municipal kag Provincial Health Office sang South Cotabato.

Ginapatuman sa subong sang mga Municipal kag Provincial Health Office sang South Cotabato ang Oplan Katok Kontra Tipdas kabahin sang ginapatigayon sa subong nga supplemental immunization batok sa nasambit nga balatian sa diin ginapadulungan ang mga puluy-an nga may-yara sang mga kabataan edad 6 tubtob 59 ka bulan.
May-angot sini, ginahingyo ni Dr. Rogelio Aturdido Jr., Provincial Health Officer sang South Cotabato ang kooperasyon sang tanan sa nasambit nga programa sang Department of Health para sa kaluwasan sang mga kabataan batok tipdas.
Liwat niya man nga ginapasiguro sa mga ginikanan nga luwas ang vaccine batok tipdas amo nga wala sang dapat nga kabalak-an.
Nahibaluan nga may-yara na sang 154 ka kaso sang balatian nga tipdas ang South Cotabato kag duha na ang patay subong nga tuig.