Utro na tagpadumduman kuman nan hepe sa kapolisàn sa syudad,Police Supt. Diomedes Cuadra Jr.an tanan mga gun/ firearm holders na kinahanglan an pagproceso na sa ila mga license to own/possess firearms labina jadton nag expire na an mga lisensya. Sumaya pa ni Supt. Cuadra na an ila taghimo kuman na Oplan Katok amoy pagpahimangno sa tanan mga gun o firearm owners na magrenew na gajud para dili mahimong illegal an ila paghupot nan amu na mga armas. Nahibaw an na dinhi sa syudad gikan sa pagpatuman sa Gun Ban kuman na tuig , sa kapin libo na mga gun holders gamay pa lamang an nagrenew sa ila mga lisensya sanan waya pa makaproseso bisan paman kon ini mi-expired na. Tagdugang pa sa hepe sa kapolisan na posible mag atubang sa kaso an mga waya magsurender o magproseso sa ila mga armas labina kon ini ila dayadayahon sa gawas.An Oplan Katok ,isa ka programa sa PNP diin house to house an pagbisita sa mga gunholders sanan awhagon ini na magkuha nan bag o na permit lakip an pagturn over sa ila mga armas sa police vaults para safekeeping samtang gihuyat pa an paggawas sa ila mga permit o lisensya.( RadyoMaN Jerson fuentes)
