Nagka-anam na og ka wise ang mga lamok karong panahona!
Kini ang gibutyag ni Dra. Fe Bongcas hinungdang ilang gimugna ang Oplan kontra Dengue o ang dungan nga pagpanglimpyo karong adlawa.
Kini gisugdan kaganinang alas dos sa hapon pinaagi sa motorkada sugod sa Rodelsa Circle paingon sa covered court sa barangay Carmen.
Pagka alas-kwatro dunay gipatingog nga siren nga maoy nagsilbing signal sa dungan nga pagpanglimpyo sa mga residente sa otsenta ka barangay dinhi sa Cagayan de Oro.
Matud ni Dra. Bongcas, una nilang sutaon ang mga kanal, ligid ug gutter nga dunay naka-stock nga tubig nga maoy posibleng itlogan sa lamok nga nagdala sa dengue.
Dala ang silhig ug fogging machine, lakip sa sutaon sa search and rescue team ang mga basura kung nalabay ba sa saktong labayanan
Dugang pa ni Bongcas nga mamahimo rang manggawas ang mga empleyado sa gobyerno ilabina sa mga opisina nga dili busy aron mosalmot sa simultaneous clean up drive karong hapon.
Human sa simultaneous clean-up drive karong adlawa, himoon na kini matag adlaw sa matag barangay aron malikayan ang pagdaghan sa mga lamok nga nagdala sa sakit nga dengue.
Giaghat usab ni Dra. Bongcas ang katawhan sa pagsalmot sa Oplan Kontra Dengue aron makabaton sa limpyo nga palibot ug kinahanglang ang tanang barangay ang manghinlo aron walay lamok nga magdala sa dengue.
Ang kahugaw sa palibot mao ang nag-unang hinungdan sa pagsaka sa ihap sa mga nataptan sa sakit nga dengue dinhi sa Cagayan de Oro.
Kini ang giklaro ni City Health Officer Dra. Fe Bongcas diin basi misaka na sa 1,934 ang ihap sa nataptan sa maong sakit hangtud ning kasamtangan bulan.
Gibutyag sa opisyal nga mohimo sila og Motorkada alang sa public awareness ug karong adlawa ilang himoon ang dungan nga pagpanglimpyo gikan sa barangay Uno hangtud sa ika-Otsenta nga barangay ning siyudad.
