Ginhingyo ni Dr. Rogelio Aturdido Jr., Provincial Health Officer sang South Cotabato ang kooperasyon sang mga firecrackers and pyrotechnics retailers, PNP, Bureau of Fire Protection, Department of Education kag iban pa nga concern nga ahensya sang gobyerno sa probinsya sa ginpatigayon nga Orientation on Iwas Paputok kahapon nga adlaw agud mapanubo pa gid sa nagahilapit nga selebrasyon sang paskwa kag pagsugata sang bag-ong tuig ang firecracker-related injuries.
Samtang ang daku nga hangkat sa gihapon suno kay Dr. Aturdido ang baligyaanay sang illegal nga klase sang palupok amo nga iya ginaawhag ang tanan nga mabinantayon sa gihapon pag-abot sang paskwa kag bag-ong tuig.
Nahibaluan nga base sa datos sang Provincial Health Office sang South Cotabato sang nagligad nga tuig nakarecord lamang sang 27 ka kaso sang firecracker-related injuries kag manubo ini sang 47 porsyento kumparar sang tuig 2017.
Bilang sabat ginpahayag ni Sir Johmel Alo, Presidente sang Firecrackers and Pyrotechnic Association sa Koronadal nga sa ila nga bahin nga mga retailers ang indi man nila luyag nga may madisgrasya sa palupok, apang indi malikawan nga may mga kaupdanan sila nga pasaway man.
May-angot sini, wala nila ginapalampas ang pasaway nga miyembro partikular na dire sa syudad sang Koronadal tungod kon madakpan nga nagabaligya sang illegal nga klase sang palupok ang pahalinon nila sa asosasyon.
