Davao City – Dili pa gayud hingpit nga kumbinsido ang Alliance of Concerned Teachers (ACT) Davao City Chapter nga adunay giluto nga plot kun ouster move ang mga kritiko ni Pres. Rodrigo Duterte.
Lisod katuhoan ang alegasyon sa Malacañang nga naglaraw ang nagkadaiya nga organisasyon ug mga indibidwal nga palayason sa palasyo ang pamuno-nasud, segun ni ACT Davao Chapter President Reynaldo Pardillo.
Matud ni Pardillo, dili lalim ang magplano sa pagpalagpot sa pinakataas nga opisyal sa nasud tungod kay igong preparasyon ang gikinahanglan niini apan gumikan kay piniliay na, ang tanan busy na sa kampanya ilabi na sa adlaw sa pagboto.
Apan kung tinuod man ugaling nga naghikyad og plano ang mga kritiko batok sa administrasyon, hayan mahitabo kini inig human na sa eleksyon karong Mayo 13 ug dili karong mga panahona, matud ni Pardillo.
Dugang ni Pardillo, bisan ang ilang organisasyon wala pa’y giplanong aksyon kun protesta batok sa kagamhanan luyo sa ilang mga mulo kalabot sa isyung suholan ug uban pa.
Tambag ni Pardillo kang Duterte nga makig-istorya na lamang kini sa mga kritiko sama sa hut-ong sa mga militante ug ipatuman ang transparent governance samtang wala pa mahitabo ang gikabaniog nga ouster plot.
Apan kun dili manumbaling sa pagmaymay ang pamuno-nasud, malagmit mahiaguman gayud niini ang kasuko sa mga kritiko nga nagtinguha sa pagpalagpot kaniya gikan sa katungdanan, pangagpas ni Pardillo.
RadyoMaN Joel Viray
