Davao City – Gipasalig karon sa Overseas Workers Welfare Administration (OWWA)-XI nga mauli dinhi sa nasud ang patayng lawas sa 30-anyos nga Pinay nga si Janice Badr, taga Panabo City kinsa gipatay sa bana niini sa Maisons-Lafitte, France.
Sa interview sa DXDC RMN Davao sa OWWA-XI, gibutyag niini nga oras nga makabalo na ang embahada sa Pilipinas sa maong nasud, gilayon niining i-plastar ug i-proseso kung pa-unsa nga mauli ang patayng lawas sa OFW pabalik sa Pilipinas.
“Naa man gyud tay repatriation assistance didto sa atoang overseas post. So ang embassy nato, as soon as ma-notify na sila kabalo na na sila kung unsay angay buhaton to arrange the repatriation of the human remains sa tanan OFWs nga namatay, whether natural or accident ang cause,” saysay sa OWWA.
Samtang gibutyag sa OWWA-Davao nga adunay assistance nga ilang ihatag sa kabanay sa biktima apan sa pagkakaron, wala pay miyembro sa pamilya ang mi-adto sa ilang opisina.
“Wala pa nag-anhi dinhi ang family regarding doon sa benefits nila. Naa lay nag-inquire sa amua pero dili family member, nangutana lang og unsay benepisyo,” saysay sa OWWA.
Nasayran nga duha ka tuig nga kasal ang Pinay kang Christophe Badr, 34-anyos nga suspek sa nahisgutang krimen.
RadyoMaN Kirby Manzon
