Gipasidunggan sa 26th SP sa 48th Regular Session si PNP Brigadier General Bernard Casas Tambaoan pinaagi sa Resolution No. 2020-1292sa iyang nahimong promosyon isip garbo sa Probinsya sa Bukidnon kaniadtong Hunyo 23, 2020 sa hawanan sa Sanggunian Panlalawigan Session Hall, Kaamulan Capitol Compound, Malaybalay City, Bukidnon.
Ang maong resolusyon gimugna pinaagi ni IPMR Ex-Officio Board Member Richard D. Macas nga nagrekognisa ug nagtimbaya kang Police Brigadier General Tambaoan sa iyang naangkon nga promosyon sa Philippine National Police gumikan sa iyang mga paningkamot, determinasyon, professionalism, dedikasyon sa trabaho ug sakripisyo sa pagserbisyo sa katawhan.
Si General Tambaoan natawo sa dakbayan sa Valencia ug naggikan sa kabos nga pamilya ug nabuhi pinaagi sa pagpamaligya ug mga utanon ug banana cue. Gikan sa Valencia, nahimo siyang usa ka mag-uuma ug construction helper ug nagdako ug nagpabilin sa dakbayan sa Malaybalay ug nakahuman sa kolehiyo.
Pinaagi sa iyang mga kasinatian, training ug dedikasyon sa pagserbisyo sa publiko pinaagi sa pagpatuman sa balaud, siya na-promotar sa ranggo nga Brigadier General sa organisasyon sa PNP diin pipila lamang ka mga angayan ang mapili.
Si Brig. Gen. Tambaoan kanhing nagserbisyo sa Probinsya sa Bukidnon isip batan-on nga Police Station Commander sa San Fernando, Manolo Fortich, ug Deputy Chief of Police sa dakbayan sa Valencia ug nahimong Executive Officer and Intelligence Officer sa Bukidnon Provincial Office. Sa kasamtangan siya nagserbisyo isip Deputy Director for Administration Police Regional Office 12.
Sa nahimong tubag ni Gen. Tambaoan sa pasidungog kaniya, iyang gibutyag nga dakong garbo niya nga nahimong anak sa Bukidon. Iya usab gipasigarbo ang iyang mga kalampusan ilabi na ang iyang mga byahi ug imbitasyon sa gawas sa nasud sa iyang pagtuon ug paghimo kaniya nga resource speaker sa larangan sa teknolohiya.
Iya usab gibutyag ang iyang mga kasinatian sa iyang pagkakabus ug kalisod sa kinabuhi ug garbo usab niini nga nagikan sa kapobrehon. Kini ang nahimo niyang inspirasyon aron molambo ug maningkamot aron dili magpabilin sa kapobrehon ang iyang pamilya ug mga kabataan.
