Davao City – Nasakmit ang kapin P1.7M kantitad sa giingong iligal nga droga gikan sa mga suspek atol sa gilusad nga drug buy-bust operation sa mga awtoridad nahitabo alas 10:30 kagabii sa Purok Maligaya, Brgy. Astorga, Sta. Cruz, Davao del Sur.
Dakpan sila si Sabas Jayme, 40 anyos, lakip ang live-in niini nga si Brendalyn Mae Llego Jose, 32 anyos, parehong mga residente sa maong lugar, pinaagi sa pinasikad nga search warrant batok kang Sabas.
Narekober sa mga dinakpan ang upat ka putos sa pinaugang 400 gramos sa gituohang marijuana, usa ka dako ug duha ka gagmay nga mga pakete sa 120 gramos nga gituohang shabu, mga plastic sachet nga adunay gituohang shabu ug klase-klaseng drug paraphernalia diin mokantidad tanan sa P1.7M.
Sumala ni Philippine Drug Enforcement Agency 11 (PDEA-XI) Regional Director Antonio Rivera nga gikunsidera isip usa ka high value target si Sabas sa probinsya sa Davao del Sur ug nakulong na kini kaniadtong Nobyembre 2017 sa kasong illegal possession of firearms ingon man sa illegal drugs apan nakapiyansa kini.
Segun ni Rivera nga gibutyag ni Salas kung kinsa ang supplier niini gani mao kini ilang sunod aksyonan.
Sa pakighinabi kang Salas, gi-angkon niini nga nagagamit kini og illegal nga droga sabay si Jose samtang gilimod nga kaniadto lang siya nagabaligya sa maong droga.
Sa pagkakaron anaa na sa kustodiya sa PDEA ang duha ka mga dinakpan ug muatubang sa kasong kalapasan sa Section 11, Section 12 ug Section 15, Article 2 sa R.A. 9165 kun Comprehensive Dangerous Drugs Act of 2002.
RadyoMaN Jason Amisola
