P14.5 million pondo sa PADAC subong nga tuig, daku nga pondo magakadto sa pagpabakod sang mga anti-drug abuse councils.

Nagalab-ot sa P14.5 million ang gin-alokar nga pondo sa Provincial Anti-Drug Abuse Council subong nga tuig nga mataas sang P6 million kumparar sang nagligad nga tuig. Ini ang kumpirmasyon ni PADAC permanent representative Board member Agustin Dema-ala.
Ang nasambit nga pondo ang magapadulong sa mga programa kag kampanya kontra droga sang provincial government kag mga member agencies.
Sa nasambit nga pondo magakadto ang P2.3 million sa Enforcement Cluster nga ipatuman sang South Cotabato Police Provincial Office (SCPPO) kag Philippine Drug Enforcement Agency (PDEA) Region XII.
Ang P3.24 million ang para sa Advocacy Cluster nga ipatuman naman sang mga nagkalain-lain nga ahensya sang gobyerno kapareho sang SCPPO, Department of Education, Provincial Information Office, Provincial Social Welfare and Development Office, Provincial Population Office, City of Koronadal kag Sangguniang Kabataan.
Magakadto naman ang P1 million para sa Rehabilitation Cluster nga ipatuman sang Integrated Provincial Health Office, Parole and Probation office kag South Cotabato Rehabilitation and Detention Center.
Samtang ang daku nga alokasyon ang magakadto naman para sa pagpabakod sang Provincial, Municipal, City kag barangay anti-drug abuse councils lakip na ang operating expenses sang PADAC nga nagalab-ot sa sa P5.9 million.
Nalakip man sa nasambit nga pondo subong nga tuig ang para sa annual search for Outstanding Municipal and City ADAC kag pagbakal sang isa ka unit sang salakyan para sa council activities.