Dako na usab ang kalipay sa transport group sa probinsya sa Sarangani ang STARTED kon Sarangani Transport Alliance for Reform and True Development tungod kay nihatag kanila og training scholarship program ang DOTr o Department of Transportation gitawag ang programa nga “Tsuper Iskolar” kung diin ang kantidad sa maong training scholarship program ang niabot pud og P2.7 Milyon ka pesos.
Atong adlaw nga Martes, gipangunahan mismo ni Governor Steve Chiongbian Solon kauban ang mga myembro sa STARTED gidumalahan ni STARTED Provincial Federation President Merly Nebres, anaa pud si transport liaison officer Sharon Esportuno, ang nahitabo nga orientation ug formal launching sa TESDA ug sa DOTr sa maong programaha nga bag-uhay lang gi-implementa sa Rehiyon Dose, sa pagsuporta nila Senador Manny ug Congressman Ruel Pacquiao, Sangguniang Panlalawigan ug mga mayores.
Ang “Tsuper Iskolar” program ang gi-disenyo sa DOTr isip pag-ayuda sa mga public utility driver and operator nga posibleng maapektuhan sa pagpatuman sa programa ni Pangulong Rodrigo Duterte nga Public Utility Vehicle Modernization Program.
Gikan ang pondo nga P2.7 Milyon ka pesos sa DOTr alang sa Sarangani Province ug ila kining gi-download sa TESDA. Ang TESDA ang magpahigayon og libreng training sa mga kwalipikadong driver-operator, sama sa Bookkeeping NC 3, Housekeeping NC 2, Gas Metal Arc Welding NC 2, Shielded Metal Arc Welding NC 3, og Bread and Pastries Production NC 2.
Mu-eskwela ang mga interesado ug kwalipikadong driver-operator sulod sa kinse (15) paingon na singkwentay-singko (55) ka adlaw depende sa pagasudlan kung asa mupailalum silag training may allowance pang ihatag kanila nga tag-P350 ka pesos matag eskwela.
Dili lang kini exclusive sa public utility driver and operator sa Sarangani kundili pwede muapil ang ilang mga asawa, anak ug parente hangtud sa 3rd degree of consanguinity.
Magsugod na ang klase karong Oktubre 26, karon ng Sabado, sa Kasfala Hall sulod sa compound sa Kapitolyo sa Sarangani ug sa opisina sa TESDA sa Gensan. Gani, may napili na ang transport federation sa Sarangani kung kinsa sa ilang mga myembro ang unang maka-benipisyo sa programa, 150 kabuok. Matag Sabado ug Dominggo lang ang klase.
Trayntay-syete (37) ka adlaw eskwelahan ang bookkeeping, singkwentay-singko (55) ka adlaw sudlan ang housekeeping, kinse (15) diyas ang shielded metal arc welding, trayntay-nuybe (39) ka adlaw ang gas metal arc welding, ug dise-otso (18) ka adlaw ang bread and pastries production. Sa matag sulod sa klase, may daily allowance kining ihatag nga P350 ka pesos. Dako na kayong matabang para sa pamilya, madugangan pa ang kahibalo nga dili lang nakatutok sa pagpamasada, pwede pang ipang-trabaho sa pampubliko ug pribadong kumpanya o dili ba kaha i-abroad tungod sa TESDA certificates nga ihatag.
Matud pa ni Retired Col. Paterno Padua, ang regional director sa LTFRB Region 12, ug ni Ms. Chris Castino, ang scholarship focal person sa TESDA sa Sarangani ug Gensan, pabor ang “Tsuper Iskolar” program sa buot magpadayon sa ilang panginabuhi nga pagpamasada ug pabor usab sa kadtong mangita og alternatibong panginabuhian. Ilang gidayig ang hugot nga pagsuporta sa mga local official gipangunahan ni Governor Solon tungod sa paghatag og dakong bili sa papel sa hut-ong sa transportasyon sa kalambuan sa tibuok Sarangani Province. Vice governor pa kaniadto si Governor Solon, iya nang na-organisa ang transport group sa Sarangani pinaagi sa STARTED o Sarangani Transport Alliance for Reform and True Development. Daghan pang programa matud pa ang muabutay, segun sa TESDA.
