SAN CARLOS CITY, NEGROS OCCIDENTAL – Ginabulubanta nga nagdangat sa kapin 6 million pesos ang balor sang shabu nga na recover sa suspek sa ginpatigayon nga buy bust operation las 11:45 kahapon sang aga sa Sitio Juan-ong, Brgy. Palampas, San Carlos City.
Sa amo nga operasyon nga ginpatigayon sang San Carlos PNP sa pagpanguna sang hepe sini nga si P/Supt. D’Artagnan Katalbas upod ang PDEA, nadakpan ang suspek nga si Christian Unabia, 29 anyos ang edad, kasado, isa ka driver sang habal-habal kag pumuluyo sang amo nga lugar.
Suno sa report, nakuha kay Unabia ang kapin sa 608 ka gramos sang suspected shabu, 30 mil pesos nga buy-bust money kag 24 mil pesos nga cash proceeds sa pagbaligya sang ginadumilian nga druga.
Kaso nga violation sang section 5 kag 11 sang Republic Act 9165 ang kaso nga natalana iga file sini nga adlaw batuk kay Unabia nga detained karon sa custodial facility sang San Carlos PNP./ Jerome Ortega photo
