P72M nga shabu narecover sa buybust sa San Carlos City

562

SAN CARLOS CITY, NEGROS OCCIDENTAL – Ginabulubanta nagdangat sa kapin 72 million pesos ang balor sang suspected shabu nga na recover sa 3 ka mga suspek sa ginpatigayon nga buy bust operation sini lang nga kaagahon sa San Carlos City.

Nakilala ang mga suspek nga mag-asawa nga amo sanday Armando Paraquelles kag Josephine Paraquelles, lunsay legal ang edad kag ang isa pa nga nakilala lang kay Alyas Putot kag pumuluyo sang Brgy. Palampas, San Carlos City.

Ang buy bust ginpatigayon sang joint elements sang PDEA 6, PDEA 7, PDEU kag San Carlos City Police Station nga ginpangunahan naman ni P/supt. D’Artagnan Katalbas, hepe sang San Carlos CPS lakip na ang Philippine Army mga las 12:30 sini nga kaagahon sa Brgy. Palampas, ciudad sang San Carlos.

Nahibaluan nga ginpatigayon ang buybust pinaagi sa nagpakilala nga mga poseur buyer sa isa ka kampo sa amo nga barangay.

Nakuha sa mga suspek ang 6 ka bulto sang suspected shabu, isa ka cellphone, motorskilo kag boodle money nga P6.8 million pesos.

Ginabulubanta nga ang amo nga suspected shabu ang nagabug-at sang more or less 6,000 grams ukon anum ka kilo kag may street value nga kapin P72 million pesos.

Sa karon padayon ang hot pursuit operation batuk sa 3 ka mga suspek matapos nga ini sila ang nakapalagyo sa katubhan sang ginpatigayon ang amo nga buy bust./PDEA File Photo

Facebook Comments