iFM Laoag – Madalusan ken masimpa ti ayus ti danum iti karayan Padsan babaen iti ‘sand extraction’ iti mabiit a panawen.
Kalikagom daytoy nga ipatungpal iti gobierno babaen met ti tulong iti China-Philippines Unified Enterprises Inc. (CPU), maysa a Philippines-based consultancy firm iti pagilian a mangisaysayangkat iti ‘sand extraction’ iti nasao a karayan.
Segun ken ni Mr. Martin Araneta, CPU external vice president, a naaddaanda ti ‘open quarry permit’ ken mannarimaanen ti panakisaritada kadagiti maapektaran a barangay iti nasao a proyekto.
Malagip a maysa kadagiti rason ti panaglayus iti siudad ti Laoag ken kasta pay iti ili ti San Nicolas ket iti saan a napintas nga ayus ti danum ken kasta pay iti kinarabaw dagiti darat ken batbato iti unegna.
Malagip nga impalubos ni Governor Matthew Joseph Manotoc ti ‘open quarry’ iti asideg iti Laoag by-pass bridge aginggana iti Monroe Island a passet iti Barangay La Paz iti siudad ti Laoag.
Nangisayangkat met ti gift-giving program kadagiti nakukurapay a kailian a maapektaran iti nasao a proyekto. Umabot iti 127dagiti benepisiario a naikkan manipu iti Barangays 30-A, 33-A ken 33B a kangrunaan a madalapos iti nasao a proyekto. Passet daytoy ti ‘corporate social responsibility’ (CSR) iti nasao a companya segun ken ni Araneta.
Inpasegurado met ni Mr. Michael Ma, presidente ti CPU a ti nadakamat a proyekto ket mangrugi iti mabiit apaman ta makompleto amin dagiti dokumento ken dadduma pay a masapol iti nasao a banag. (Bernard Ver, RMN News)
