PAGHATAG sa tukmang kasayuran ug kahibalo ang tinguha sa Sangguniang Panlalawigan (SP) sa Bukidnon sa gipalabang nga resolusyon nga naghangyo sa traffic management officers and enforcers sa kada lungsod ug syudad sa lalawigan, lakip ang Land Transportation Office (LTO), PNP-Highway Patrol Group (HPG), nga maghatag ug tukmang kahibalo sa mga drivers sa motor ingon man sa mga hinay nga gapadagan nga salakyan nga magpabilin sa outer o shoulder lanes samtang anaa ga-biyahe sa national highway.
Sa mosyon ni Board Member Melchor P. Maramara, sa ikaduhang distrito sa probinsya, gipasabot niini nga palisiya sa gobyerno nga panalipdan ang katawhan gikan sa peligro ug makadaot nga sangputanan sa mga aksidente sa mga salakyan. Kadaghanan sa mga LGUs sa Bukidnon adunay kaugalingong buhatan sa pagdumala sa trapiko, diin aktibo nga nagpatuman sa kahapsay sa dalan diha sa ilang tagsa-tagsa ka mga lugar.
Gawas sa padayong pagmintina sa kahapsay nga dagan sa trapiko, gimanduan usab ang nasangpit nga mga tigpatuman nga susihon ug dakpon ang makalapas sa lagda sa trapiko samtang nag-agi sa national highway ug sa ingon paghatag higayon sa mga nagpatuman nga sila ma-edukar kabahin sa mga lagda ug regulasyon sa trapiko.
Gipasabot usab ni Board Member Maramara ang katuyoan sa maong resolusyon nga makahatag direktiba aron matabangan nga malimitahan ang ihap sa mga disgrasya sa dalan nga dili makalangan sa motorista diha sa mga pampublikong dalan kung aha kalagmitan maoy hinungdan sa aksidente tungod kay wala magsubay sa tukmang dalan, ilabina ang mga slow-moving vehicles.
Sa data gikan sa PNP-Bukidnon, pinaagi ni Police Investigation Detective Management Unit chief Police Lieutenant Colonel Silvestre D. Asiong, Jr. nga anaa sa 524 ka mga kaso ang natala sa vehicular accident [reckless imprudence resulting to homicide, physical injury, ug damage to property] sa tuig 2019, 312 sa tuig 2020 ug 145 na ang natala alang sa January to April 14, 2021.
