Ginahatagan ligwa ni Negros Occidental Governor Eugenio Jose Lacson ang mga alkalde nga magpatigayon sang mas istrikto nga tikang agud mapasiguro nga malimitahan ang tawo sa dalan samtang epektibo ang Enhanced Community Quarantine (ECQ).
Ini ang sabat sang gobernador may angut sa Executive Order ni Toboso Mayor Richard Jaojoco kun sa diin lockdown ang ila ipatuman sumugod Marso 30 tubtob Abril 5, 2020 kag indi ECQ.
Sa interview sang DYHB kay Gov. Lacson, ginpahayag sini nga indi na niya pagpadaluman kun nagakontra ang EO ni Jaojoco sa iya ginpirmahan nga EO 20-2020 kun sa diin ipaidalom ang Negros Occidental sa ECQ sumugod Marso 30-Abril 14, 2020.
Suno sa gobernador, naistorya naman sini si Mayor Jaojoco kag ginpasiguro sini nga ang banwa ang magahatag sang pagkaon sa ila mga residente sa sulod sang isa ka semana nga lockdown agud wala sang magwa, magluwas lamang kun emerhensiya.
Ang punto lamang sang EO 20-2020 suno kay Lacson, amo ang pag-limit sang tawo sa dalanon agud indi maglapta ang virus, gani kun nakita sang mga alkalde nga may mas epektibo pa nga tikang magluwas sa ECQ, iya ini ginapahanugutan.
