Dili supak sa balaod sa Comelec ang pag-indorso ni bisan kinsang gobernador ug mayor sa mga kandidato, alang sa Brgy. ug SK elections karong Mayo katorse ning tuiga.
Kini ang gibutyag ni Comelec regional director Reynato Magbutay, tungod kay katungod kini sa mga gobernador ug mayor nga mopadayag kung kinsa nga mga kandidato ang ilang suportahan.
Dugang pa ni Atty. Magbutay, nga mahimo lamang kining ilegal kung ang kandidato sa pagka-Barangay ug SK ang mogamit sa political party ug kung modawat kinig donasyon gikan sa piniling opisyal sa lalawigan, munisipyo ug syudad.
Gipahayag usab sa maong opisyal nga sugdan ang pagduso sa sertipiko de kandidatura sa Abril katorse hangtod 21, samtang magsugod ang campaign period sa Mayo kwatro hangtod trese ning tuiga.
