Gidepensahan sa Philippine Health Insurance Corporation kon Philhealth region 10 ang ilang istriktong pagpangayo sa authorization letter kung dili ang hingtungdan mismo ang adunay transaksyon sa buhatan.
Sa interview sa RMN Malaybalay ngadto kang Philhealth 10 regional spokesperson Merlyn Ybañez, gibutyag niini nga gihimo nila kini tungod sa daghanang online services nga nagtanyag nga maoy mukuha sa MDR o ID bugti sa dakong kantidad sa salapi.
Nasayran nga mukabat sa 500 pesos ang pangayuon bugti sa usa ka ID, ang gitanyag sa mga bugos pinaagi sa pag-aghat online.
Matud ni Ybañez nga walay bayad kon libre ang pagkuha sa MDR ug ID maong dili matud pa angayang magpa-ilad ang publiko sa maong mga mudos operandi.
Hinoon giklaro niya nga wala kini sa rehiyon 10 apan ang ilang gihimo mao ang pagpanagana lamang.
Gibutyag ni Ybañez nga inisyatibo kini sa Philhealth region 10 nga kinahanglang magdala ug authorization letter kung mukuha ug MDR sa ubang tawo ug dili mamahimong mukuha ang laing tawo sa ID sa miyembro.
Gipasabot pa niya nga ang ilang gihimo mao lamang ang pagprotekta sa mga miyembro gikan sa mga mangingilad.
