Negatibo ang resulta sa gihimong pag search sa kapolisan sa Station 4, Carmen diha sa panimalay sa magtiayong Rebecca ug Edwardo Orallo sa Zone 1, Barangay Bonbon.
Gi-search sa kapolisan ang balay sa magtiayong Orallo dala ang search warrant nga giisyu ni Judge Alcantar kung asa nakabutang nga dunay mga armas sulod sa panimalay.
Mahinumduman nga gipanag-iyahan sa magtiayong Orallo ang sakyanan nga gigamit sa mga suspek nga mipusil-patay sa usa ka polis sa Libertad, Misamis Oriental niadtong Pebrero 17, adlawng Lunes.
Matud ni Maam Rebecca Orallo, nalipay kini nga negatibo ang gihimong pag-search sa ilang gipuy-an tungod kay nagpasabot lang kini nga wala silay gitagoan.
Giangkon usab ni Ms. Rebecca nga sood niini nga higala ang usa sa mga suspek sa pagpamusil tungod kay bana kini sa iyang secretary ug maoy driver sa ilang sakyanan.
Apan giklaro ni Rebecca nga wala siyay kasayuran sa personal nga kalihokan sa ilang driver.
Sa laing bahin, Wala nay plano ang pamilyang Orallo nga mo file back og kaso sa mga nag-serve sa warrant.
Kini ang gibutyag ni Atty. Angel Lim, ang legal officer sa pamilyang Orallo.
Mapasalamaton na lang matud pa sila nga nahinloan na ang ilang ngalan kalabot sa isyu sa engkwentro sa Libertad diin ilang sakyanan ang gigamit sa mga suspek.
