BACOLOD CITY – Ginalantaw karon sang utoridad nga isa sa posibilidad sa pagtiro patay kahapon kay Atty. Rafael Atutubo amo ang iya pag-uyat kag pagdepensa sa mga kaso sang illegal drugs sa ciuad sang Bacolod kag Negros Occidental.
Si Atty. Atutubo, 62 anyos, ang gintiro may mga las 11:30 kahapon sang aga sa Galo BBB, Brgy. 20, Bacolod City sang wala makilala nga duha ka mga suspek sakay sang motorsiklo.
Nag-angkon sang patal nga igo sa ibabaw sang wala nga kilay si Atutubo nga amo ang ginkabangdan sang iya kamatayon apesar nga gindala pa ni sa Bacolod Doctor’s Hospital.
Sa press conference nga ginpatawag sang BCPO sa pagpanguna ni City Director, PS/Supt. Francisco Ebreo, ginsiling sang city director nga ginalantaw sang pulis ang tanan nga anggulo kag motibo sa pagpatay sa amo nga abogado kag isa diri amo ang sa bahin sang mga gina uyatan niya nga kaso sa illegal drugs.
Ini kasunod nga 80 tubtub 90 porsiento sang mga kaso nga gina-uyatan ni Atutubo amo ang pagdepensa sa mga kaso sang akusado batuk sa illegal nga druga.
Sa karon ginahibalo pa gid sang utoridad kon bala ang mga suspek nga nagtiro sa iya ang mga gun for hire ukon tawo nga personal nga may akig sa abogado.
Samang, nagpahayag naman sang kanugon ang mga utoridad bangud nga indi nila ma-gamit ang CCTV sa area sang scrime scene bangud wala na record ang hitabo kay puno na ang memory card sang amo nga device.
Sa pihak nga bahin, nagpagwa sang statement ang Integrated Bar of the Philippines (IBP) Negros Occidental Chapter nga nagapahayag sang hugot nga pagkondenar sa kamatayon sang ila kaupod.
Suno sa IBP ang pagpang-atake sa isa ka abogado nagapahuyang sa practice of law kag nagapa-demoralize sa mga abogado sa pagtuman sang ila ginsumpaan nga trabaho sa pagdepensa sa ila mga kliyente.
Angut sini, ginaduso sang IBP sa utoridad nga magpatigayon sang madalum nga imbestigasyon sa pagpatay kay Atutubo kag dakpon sa gilayon ang may kahimuan sini./dyHB BACOLOD
