8 ngadto sa 12 ka mga bagyo ang nakit-an nga mosulod sa nasud sugod karong buwana hangtud sa buwan sa Setyembre karong tuiga matud pa sa state weather bureau.
Ang weather specialist sa Philippine Atmospheric, Geophysical and Astronomical Services Administration kun Pagasa nga si Netherlen Soletrero niingon nga ang unang bagyo nga nakit-ang mosulod sa Philippine area of responsibility kun PAR mosulod karong buwana.
Posibleng mosunod ang usa o duha ka bagyo sa buwan sa Mayo o Hunyo. Sa buwan pud sa Hulyo, Agosto ug Setyembre, adunay nakit-ang duha o tulo ka bagyo nga mosulod sa Pinas.
Bisan pa man ang buwan sa Abril ug Mayo maoy pinaka-init sa atong nasud matag tuig, niingon si Soletrero nga adunay gamay kaayong tsansa nga molahutay ang bagyo ug mosulod sa PAR.
Sa record sa Pagasa gikan sa tuig 1948 ngadto sa tuig 2010, adunay average nga 20 ka bagyo ang nakit-ang mosulod sa Pinas matag tuig. Pero 10 ra ang naka-apekto sa nasud.
