Pagbaton nan CCTV cameras sa mga tindahan istrikto na ipatuman sa gobyerno nan Surigao City Ini an mga natuki sa dihang taghimo an regular na session kaganina na kon diin tagpatawag an hepe nan Business Permit and Licensing Office na si Ernesto Kang kalabot sa mga mokuha nan mga business permits para kuman 2018. Sumaya pa ni Vice Mayor Alfonso Casurra, sa City Ordinance 304 na tagpasar adton 2010, an mga financial/lending insitutions, mga bangko,gasoline stations sanan pawnshop an tag-awhag na magbutang nan mga CCTV cameras. Hinoon plano nila na amendahan ini para malakip an iban pa na mga negosyo pareho sa mga groceries, dept. stores ug malls, lakip an mga eskuwelahan, hospitals, funeral parlors, ktv bars, restaurants, internet café’s sanan iban pa. Sa habig ni Mr. Kang, andam sila na mosunod nan istirkto sa pagpatuman sa City Ordinance ug dili nila hatagan nan permit kon waya mosunod sa pagpahimutang nan CCTV cameras labi na kon may amendasyon na himoon sa karaan na ordinansa. Kinahanglan isab na an mga cctv cameras an may mga recorder para sa monitoring sa panghitabo sa palibot ug sajon na ma-review, mapakita an na-record.
