Davao City-Mahimo lang nga dekorasyon sa lawas sa pulis ang camera tungod kay dili kini magdala og kasiguruhan aron madayag ang kasaypan sa mga otoridad ug adunay mapatubag kanila kung makakumitar sila og abuso sa matag police operations.
Gibatbat ni New Guardian for Freedom and Democracy President Tito Porras gawas nga dili kini garantiya, makasapi lamang niini nga proyekto kadto mga negosyante ug mga politiko nga pabor sa sugyot.
Suma ni Porras, imbes body cam mas labing maayo kung ipatisok sa kasingkasing sa mga otoridad ang saktong pagpatuman sa balaod ug paggukod sa kriminal sa ingon walay mag-abuso sa gahom.
Ang pag-edukar sa mga pulis mahitungod sa insaktong implementasyon sa balaod ug pagpatuhog niini sa pagbati ngadto kanila epektibo nga paagi aron ma-undang ang extra judicial killing sa mga drug pushers ug users.
Hinoon, gibarugan ni Porras nga mas nindot unta kung una mapuhag ang tinubdan sa shabu kay kung mabungkag ang sindikato sa droga otomatiko sab sa kalit mapapas ang EJK nga gialigar sa mga kritiko sa administrasyong Duterte.
Sa katapusan, giangkon ni New Guardian for Freedom and Democracy President Tito Porras nga dako unta ikatabang sa publiko ang body cam kay dinha makita kung gi-unsa pagpatuman ang mga operasyon ug sa ingon madeterminar gilayon kung aduna ba’y kalapasan o wala ang mga otoridad.
Kasamang Joel Viray
