Davao City – Nagpabiling misteryo sa kapulisan sa Buhangin ang upat ka mga tawo nga midagit sa batan-on sa may Emily Homes pasado 10:00 miaging gabii.
Ang mga suspek nagsakay sa puti nga van nga walay plaka ug pulos nakabonnet dihang misulod sa internet café kung asa nagdula og dota ang biktima.
Suma ni Police Chief Inspector Jack Tilcag, hepe sa Buhangin Pnp nga bisan ang nakakita sa insidente dili makahulagway sa upat ka suspek tungod sa kalit nga panghitabo.
Gipusasan sa mga suspetsado ang 19 anyos nga si Alex Corteza ug pugoso gipasakay sa van ug dayon paturatoy sa wala matino nga direksyon.
Subayon karon sa kapulisan ang dapit aron susihon kun aduna ba’y CCTV camera ang establisimiento sa lugar.
Gitug-an sa mga ginikanan nga matag gabii galakaw ang biktima ug kadlawon na maka-uli diin subay sa pagdukiduki posibleng nalambigit sa droga ug kawat ang biktima butang nga gihimakak sa inahan.
Nagdumili pa ang opisyal sa pagtumbok sa anggulo sanglit nangalap pa sila og dugang impormasyon gikan sa mga barkada sa biktima.
Hinoon nagduda si Tilcag nga posibleng away sa gang ang rason sa insidente ug mao kini ang ilang gipalawman sa imbistigasyon.
RadyoMaN Joel Viray
