MURCIA, NEGROS OCCIDENTAL – (2nd Update ) May person of interest na nga natumod ang Murcia Municipal Police Station angut sa kamatayon sang isa ka iloy nga nasapwan ang bangkay sa sulod sang kampo sa Brgy. Sta. Cruz banwa sang Murcia.
Kahapon mga las 8:30 sang aga sang nasapwan ang bangkay sang biktima nga si Eden Depiño, 39 anyos ang edad, residente sang Purok Simburio, Brgy. Salvacion, Murcia sa sulod sang kampo sa Brgy. Sta. Cruz sang amo nga banwa.
Sang nasapwan ang bangkay ni Eden may nakita nga pilas sa iya ulo nga posible ginlampusan sang matig-a nga bagay, may pilas sa guya kay ginkuga pa gamit ang strap sang iya bag kag wala na ang iya nga cellphone.
Base sa inisyal nga imbestigasyon sang pulis sang nagligad nga Miyerkules, July 18 may mga las 6 sang gab-I, may isa ka lalaki nga nagpangayo sang bulig sa isa ka tagbalay nga residente sang amo nga lugar.
Suno sa amo nga tagbalay, kilala niya ang lalaki gani ginpasugtan niya ini nga mag-tiner sa ila balay matapos nagpangayo ini sang bulig kay siling sini, ginapangita niya ang iya asawa.
Apang natalupangdan sang tagbalay nga puno sang lunang ang amo nga lalaki.
Pahayag pa sang tagbalay nga las 2 na sang kaagahon, July 19 sang naglisensya ang lalaki nga magapauli na.
Suno sa bana nga Angelo, katapusan nga nakita ang iya asawa hapon sang July 18 agud magpadulong na sa iya trabaho apang nasapwan nga patay na pagkaaga, July 19.
Si Eden ang may 2 ka mga kabataan, naga obra sa Angels Burger sa Victorias City kag bread winner sa ila pamilya bangud nga ang iya bana ang may balatian kag indi makasarang mag-obra.
Nagapati naman ang bana ni Eden nga si Angelo nga posible hold-up ang motibo sang krimen bangud nga nadula ang iya sini cellphone.
Angut sini, na-imbitar na sang Murcia MPS ang tagbalay nga amo ang ginkadtuan sang person of interest nga ginasuspetsuhan may kahilabtanan sa pagpatay sa biktima./dyHB BACOLOD
