Gisubay lamang ni Kapitan Ian Achas sa Barangay Puerto ning syudad ang ordinansa sa ilang barangay nga nagdili sa mga tricab ug trisikad nga moagi sa national highway.
Kini ang tubag ni Kapitan Achas kalabot na sa problema sa pagpamasahero sa mga motorized sikad ug trisikad diha sa barangay atol sa interview sa dxCC-RMN Straight to the Point kaganihang buntag.
Matud ni Kapitan Achas nga adunay 200 ka sikad gikan sa barangay Bugo ang iyang gitugutan nga makasulod sa barangay Puerto apan ang uban niini iya nang gidid-an sa pagsulod.
Nanghinaut karon ni Kapitan Achas nga masabtan sa tanan ang iyang punto nga kadto lamang mga sikad nga gi-recognized sa Barangay Council sa Bugo ang iyang dawaton tungod kay makahatag na og problema sa trapiko ang mga kolorum.
Samtang giangkon ni Barangay Puerto Kapitan Achas nga tinuod nga dunay mga stickers ang mga sikad nga pwede lang makasulod sa iyang barangay.
Kini nga mga sikad mao ang gihangyo kaniya sa Barangay Bugo.
Tumong sa iyang pagbutang sa sticker nga mailhan ang gihangyo kaniya nga mga traysikad.
Giklaro usab ni Kapitan Achas nga fake news ug dili tinuod ang nanggawas nga alegasyon nga iyang gipangwarta ang mga stickers tungod kay wala siya sukad nangwarta sa iyang barangay.
