PONTEVEDRA – Nangin isa ka trahedya ang malipayon nga pagselebrar sang pamilya Delis, Priolo, Detablan kag Gerson sa ika-lima ka tuig nga pag sukat ni Juliana Priolo Detablan sa Bianes Beach Resort sa Balangigay, banwa sang Pontevedra sini nga hapon.
Ini nga magpamilya ang lunsay pumuluyo sang Carolina, Barangay 2, syudad sang La Carlota.
Basi sa panaysayon ni Bernadeth Gerson, lola sang may birthday nga mga 25 sila nagpaligo sa Bianes Beach Resort para magpangalipay bangod kay birthday sang iya apo kag para makatipon tipon man sila nga magpamilya.
Nagkuha sila sang duha ka mga cottage sa diin sang mga alas dos ang takna sang hapon diri na kag nagbundak ang tuman ka baskog nga ulan kag gin-updan pa sang mabaskog nga pagpangilat.
Sang hinali lamang may nagsigabong ang mabaskog nga kilat kag didto na nabatian nga may nagsinggit nga naigo sang kilat ang sa pihak nga cottage.
Sa amu nga cottage atu didto nagapasilong sanday Leonard Delis, 13 anyos, first year hiigh school sang Doña Hortensia Salas Benedicto National Highschool nga amo ang napatay, Job Detablan, 46 anyos, may paso sa pila ka bahin sang iya nga bahin sang iya nga lawas kag amay sang birthday celebrant nga nakaagum man sang paso sa lawas.
Ang mag-amay ang yara na sa karun sa maayo nga kahimtangan sa diin gikan sa Valladolid District Hospital tigayon ini sila nga ginpangtransfer sa Bacolod Adventist Hospital sa Brgy. Taculing syudad sang Bacolod.
Basi sa inisyal nga imbestigasyon sang Pontevedra Police Station paagi sa ila nanday SPO3 Louie Uychocde, team Leader, PO3 Eldefonso Casugod, investigator kag PO1 Dave Escobar nga ang napatay nga si Leonard Delis ang nagahampang sang cellphone kag posibli amo yadto ang kabangdanan kun ngaa gin-amag ini sang kilat ang ila nahamtangan nga cottage./Grace Supe
