Gi-review ug gitun-an karon sa Department of Justice ang desisyon ni Judge Jeoffre Acebido sa Regional Trial Court Branch 41 nga nag-dismiss sa kasong illegal drugs ug illegal possession of fire arms nga gipasaka batok kang Johaira Macabuat alias Marimar ug mga kauban.
Matud ni Regional State Prosecutor Merlyn Uy nga kon unsa man ang ilang finding sa ilang pag-review sa desisyon ni Judge Acebido ila kining ipadala sa Department of Justice Manila alang sa dugang action ug recommendation.
Gibutyag ni Uy nga dakong set back sa kampanya sa gobyerno batok sa illegal drugs ang kapakyas sa PDEA sa ilang pagsunod sa insaktong paagi sa pag-serve sa Search warrant didto sa balay ni Marimar sa Ballon compound, Barangay Kauswagan ning syudad niadtong July 23, 2016.
Gipasabot ni Uy nga bisan ilang gikadismaya ang pag-dismiss sa kaso ni Marimar ug mga kauban apan ilang gihapon nga girespeto sa DOJ ang maong desisyon ni Judge Acebido.
Sigon sa desisyon ni Judge Acebido, nagbutyag nga gi-runda sa PDEA ang balay ni Marimar niadtong July 31 2016 nga walay witness nga mga barangay officials.
