Nasubo karon ang pamilya ug mga kaubanan sa trabaho ni Bukidnon Provincial Election Supervisor Atty. Stalin Baguio human kini maaksidente sa Purok 2, Patag, Barangay Bagontaas, Valencia City, Bukidnon nga maoy hinungdan sa iyang hinanaling kamatayon.
Matud sa Valencia City Police Station nga dead on arrival nang nadala sa hospital ang 48 anyos nga si Atty. Baguio, minyo nga nagpuyo sa RER Kauswagan ning syudad.
Mahinumdoman, nga nagmaneho sa iyang Toyota Fortuner si Atty. Baguio sa national highway sa Malaybalay City ug paingon unta sa Valencia City dihang kalit milagpot ang dakong bato nga gikan sa walang ligid sa iyang nakatabong dump truck mga alas-10:10 sa buntag niadtong Biyernes.
Nasayran nga ang dump truck gipanag-iyahan sa Oxford Mines Inc. nga gimaneho sa 45 anyos nga si Ruel Dumandan, minyo nga taga- Purok 6, Casisang, Malaybalay City.
Matud pa nga milagpot ang bato nga gikan sa ligid sa dump truck paingon sa windshield sa sakyanan ug miigo sa dagway ni Atty. Baguio.
Samtang, detinado na karon ang driver sa truck human kini masikop niadtong Biyernes sa gabie sa kapulisan sa Valencia City Police Station human ang gihimong hot pursuit operation.
Sa karon kasamtangang gikustodiya ang driver sa truck sa Valencia City PNP, kinsa miingong wala siya kabalo sa maong panghitabo.
Gibutyag pa usab sa driver, nga base sa kuha sa CCTV footage wala siyay katabo nga sakyanan ug gipamugos pa nga gisusi niyang daan ang ligid sa iyang gimanehong sakyanan.
Dili usab matud pa niya maangkon nga iyang sayop ang maong panghitabo, apan mangayo gihapon siya og pasaylo kung gikan sa iyang gimanehong sakyanan ang maong bato.
