Gi kondena karon ni Regional Director PB Gen. Froilan F. Quidilla, sa nahitabong dili maka tawo nga pagpatay sa usa ka sakop sa PNP niadtong nakalabayng Domingo.
Sayod naman ang mga tinugyanan sa balaod ilabi na ang mga pulis nga oras mogawas kini sa ilang balay para sa ilang trabaho isip tigbantay sa kahapsay ug kalinaw adunay posibilidad nga dili na makauli nga buhi.
Usa na niini si Patrolman Pedro Umpad, kinsa namatay sa dihang miresponde sa gireklamong drag race.
Dali nga miresponde ang mao nga biktima uban sa iyang kauban nga si Patrolman Adamer Pandangan kalabot sa mao nga reklamo.
Tuod man nahidangat sila kun asa adunay drag race, apan walay duha-duha nga gipamusil sila sa makadaghan nga higayon.
Nakaangkon ug samad pinusilan si Patrolman Umpad, hinungdan mibalos ug pabuto si Patrolman Pandangan kauban sa biktima, pero kusog kaayong nakapadagan ang responsible.
Gisulayan pa unta ug dala sa balay tambalanan ang biktimang si Umpad, pero namatay ra gihapon pipila ka minute ang milabay.
Butyag pa ni PBGen. Quidilla, ang pagkamatay ni Umpad, dakong kawad-on sa PRO9, tungod sa iyang pagka matinud-anon aron sa pagsilbi ug pagpanalipod sa komunidad.
