Gibana-bana nga anaa sa 100-thousand pesos ang damyos sa sunog sa duha ka andana nga balay sa San Nicholas, Barangay Puntod ning syudad.
Ang maong panimalay ang gipanag-iyahan sa usa ka Melody Serillo, usa ka broker, ug negosyante.
Nasayran nga lima ang kompirmadong patay sa insidente, ug naila ang mga namatay nga sila si Louie Serillo, 10 anyos, Michelle Serillo, 13 anyos, Mary Grace Serillo, 12 anyos, Mark Kenneth Serillo, 21 anyos, ug ang uyab niini nga si Connie Landong, 24 anyos taga Claveria Misamis Oriental.
Samtang naila ang mga samaran kinsa una nga gipangdala sa Northern Mindanao Medical Center kon N-M-M-C nga sila si Mary Joy Serillo, 13 anyos, Kerjun Serillo, 23 anyos, ulitawo, ang tag-iya sa balay nga si Melody Serillo, ug ang igsoon niini nga si Lilibeth Carillo, 45 anyos, minyo.
Matud ni Senior Fire Officer 1 Imelda Barasan, natawag kanila ang sunog ala 1:48 sa ug narespondihan nila ang area ala 1:52 sa kadlawon.
Dugang pa ni Senior Fire Officer 1 Barasan, nga usa ra ka balay nga duha ka andana ang nasunog ug padayon pa ang ilang imbestigasyon sa hinungdan sa sunog.
Samtang giklaro ni Senior Fire Officer 1 Imelda Barasan, nga nangatulog ang mga biktima sa 2nd floor dihang nahitabo ang insidente.
Matud ni Barasan nga walay bintana o bisag unsa nga lutsanan sa taas, hinungdan nga daghan ang patay.
Dugang pa ni Barasan, nga sa iyang pagpakighinabi sa tag-iya nga si Melody Serillo kinsa naa karon sa hospital, naa na sa ground floor ang kalayo hinungdan nga naay nangambak, samtang ang uban ang miagi sa gibutangan sa aircon.
Nasayran nga tulo ka patayng lawas ang nakit-an sa ground nga bahin, samtang duha usab ang naa sa taas.
