General Santos City— Wala mahinayon ang pagkuha sa usa ka samaron nga miyembro sa rebeldeng New People’s Army kon NPA nga nasamdan atol sa nahitabong engkwentro sa munisipyo sa Alabel, Sarangani Province.
Sumala ni Lt. Col. Marion Angcao, Battalion Commander sa 73rd IB, nga gumikan matud pa sa maot nga panahon wala gidayon ang pag- byahe sa surenderee nga si John Ray Prasan Alyas Buntog nga taga Malita, Davao Occidental.
Pamahayag niini nga karong umaabot pa nga Agosto 19 subling kuhaon ang nahisgutan aron nga madala sa Malita aron patambalan, hinuon giklaro ni Lt. Col. Angcao nga nahatagan naman ug first aid ang nasangpit aron nga dili mugrabe ang kahimtang niini.
Nasayran nga Agosto 10 pa sa dihang nahitabo ang engkwentro apan kagahapon lang kini misurender pinaagi sa mga opisyal sa barangay gumikan sa kahadlok nga mamatay. Wala matud pay dalang armas ang nahisgutan human nga gikuha sa iyahang mga kaubanan dihang makita nga dili na kini mapuslan pa sa iyahang grupo nga mao ang Guerilla Front 71.
Sa uwaheng engkwentro nga nahitabo sa Sitio Akbual, mokabat sa 34 ka mga pamilya ang mihikling, apan sa karon anaa nalang sa 29 ka pamilya ang nagpabilin sa evacucation center. ( Lore Mae V. Romualdo)
