Iligan City- Gipahibalo ni Atty. Jam Dimaporo, hepe sa National Bureau of Investigation- Iligan District Office, nga nagpadayon na sila sa pag-isyu og NBI clearance sugod kagahapon, o duha ka adlaw human maapil ang ilang buhatan og kasunog sa Sto. Nino Academy niadtong Pebrero 13.
Apan iyang giklaro nga limitado lamang kini tungod kay isa lang man ka unit sa ekipo ang napahulam sa rehiyonal nga buhatan sa NBI aron ma -proseso ang mga aplikasyon.
Nagpasabot nga maximum nga 160 lang ka mga kliyente matag- adlaw ang ilang ma- accommodate. Niadtong wala pa mahitabo ang sunog, upat ka station ang dungan nga magtrabaho.
Tungod niini, gihangyo ni Dimaporo ang publiko nga kung mo- apply og clearance, deretso nalang ngadto kanila, dili na moagi sa mga nagdawat og online application sa gawas aron makontrol nila ang gidaghanon sa tawo.
Naghangyo usab kini nga kung mahimo, ang mga maka- pabor nga mokuha sa ilang clearance sa ubang NBI office, mas maayo kung didto nalang aron dili na sila madugay.
Ang mga pinakaduol nga NBI district office mao ang Cagayan de Oro, Ozamiz City, Pagadian City ug Cotabato City.
Kung kahunumduman nga apil nga naugdaw sa dakung kalayo ang katunga sa buhatan sa NBI.
Wala masunog ang mga computer apan lakip kining nangabasa sa tubig gikan sa bombero hinungdan sa pagkaguba sa maong mga kagamitan.
Naputol usab ang linya sa ilang kuryente ug naghangyo nalang sila karon nga maka-tap sa tapad nga balay.
Temporaryo silang nag- opisina sa may bakanteng luna tapad sa ilang buhatan. (photos by Divina M.Suson)
