Bacolod City – Nagmando na sang investigation ang command group sang Police Regional Office 18 para mahibalu-an kun sin-o nga police ang nagpaguwa sang confidential memo halin sa Negros Occidental Provincial Police Office (NOCCPO) nga nagpahayag sang pila ka mga targets sang CPP-NPA sa Negros Island Region (NIR).
Ang amo nga memo ang para lang kun tani sa mga Chief of Police kag Intelligence Section para sila ang gilayon nga magdihon sang counter measures batok sa plano nga pag pang-atake sang rebelding NPA sa Negros.
Kalakip sa “Hit List” sang NPA amo ang pila ka mga retired intelligence operatives sang Philippine Army, Police personnel, public officials, lakip na si Mayor Magdaleno ‘Magsie’ Peña sang banwa sg Moises Padilla.
Apang ang confidential memo ang ginhatag sa pulis sa opisina ni Mayor Peña kag ini naman ang ginpapublish sa isa ka local newspaper.
Si Peña ang gin-ambush sang Mayo 30, 2007 sang mga nag-ako nga katapo sang NPA nga Boy Gatmaitan Command.
Duha sa iya mga bodyguard ang patay samtang pilason naman siya upod ang duha pa gid ka bodyguard kag ‘protege’ sini nga Gerany Suantengco.
Sa interview sang dyHB sa kay PSinsp. Armylyn Vargas, ang Public Information Officer sang PRO18, nagaka balaka ang pamunu-an sang Police Regional Office bangud sa issue sang integrity sang mga pulis sa paghandle sang confidential documents.
