Roxas City, Capiz – Gindayaw kag ginpasalamatan ni Mambusao Mayor Leodegario “Jun” Labao Jr. ang tikang sang provincial government nga pagpahamtang sang isolation facility para sa asymptomatic COVID-19 positive patients.
Suno sa alkalde, ini ang madugay na nga ginhenyo kag panawagan sang kapareho nga mga municipal mayors nga katapo sang League of Municipalities of the Philippines- Capiz Chapter ang nasambitan nga pagpahamtang sang isolation facility para sa asymptomatic nga pasyente bangud sa limitado lamang ang ma-akomodar nga numero sang mga pasyente sang kada LGU sa tagsa nila ka municipal temporary treatment facility.
Samtang ginapanan-aw man ni Labao nga mangin dako nga bulig sa probinsya ang plano nga paghamtang sang kaugalingon nga swab test ukon RT-PCR testing facility agud nga mangin madali na ang pagpaguha sang resulta kag indi na maghulat pa sang madugay sang resulta nga gikan sa Western Visayas Medical Center sa syudad sang Iloilo kun sa diin nahamtang ang sub-national testing facility.
